I møteboka er av og til oppført kor mange som møtte og det kan nemnast at på møtet i 1965 var der 150 i alt, Dette varierte jo med veret. Eg har sjølv rett ofte vore på møta, heilt frå gutedagane, og var veret godt, var det mange tilstades - ikkje sjeldan 2-300 vil eg tru.

Den gamle seterbua var intakt då, og der fekk ein kjøpa brus og diverse, som var henta opp frå Vikebygd. Og før mi tid – då folk framleis støla der, var det jamvel, "fløytekodla"” å få kjøpt møtedagen, er fortalt meg.

Som alt nemnt var eg tidleg med på møta. Eg budde i Ølensvåg då. Bror min og eg var raske på foten - og tok ikkje heimanfrå før andre var komne langt opp i liene – opp frå Viland.

Eg tykkjer endå å sjå for meg karane skjorteberarma og damene, også gjerne i ljose klede – i sumarvarmen. Ein kunne sjå dei på lang avstand. Eg kan nemna nokre namn som : Sigve Espeland, Sigve Viland (Småje), Osmund Espeland (Nese), Kasper Espeland, systrene Ragnhild og Valgjerd Viland, Alv Viland m.fl.

For oss borna var gjerne ikkje sjølve møtet det mest sentrale, men turen, nistematen og drøsen mellom dei vaksne – rundt kaffikopen.

Det kan nemnast at dei som har stått lengst som formann i styret er Hans K. Dommersnes frå Vik og Karl Granberg frå Ølensvåg.

Ein set stor pris på idrettslaget sitt initiativ med å få oppsett ei fjellstove ved stølen, som fritt kan brukast under møta dersom det er regn.

Folk frå Ølen, Skjold og Vats har no i årevis reist opp frå Innbjoa over Rotvoll, og då tek det vel berr litt under timen til dei er oppe på Vikestølen. Og ved siste møtet gledde det oss at det var komen ny parkeringsplass i skiftet Eikås/Rotvoll. Takk For det!

Tanken som låg bak stiftinga av Vikestølsmøtet, var å vinna sjeler for himlen – og det var ein stor tanke. Dette er og vårt mål som står for møta no. Og det er å vona at det av Guds ord som har blitt bore fra der, har falle i god jord – og ikkje på steingrunn.