Håp om at utbetring av vegen forbi Vossaplasset i Vikebygd kan starta seinhaustes. Trongen for å leggja ny kraftlinje som kabel i jord kan føra til oppstart som eit spleiselag og med kommunal forskottering på Fylkesvegen.
 

Dei smale svingane ved Vossaplasset i Vikebygd (Fv. 734)

Det er endeleg håp om utbetring av vegen forbi Vossaplasset i Vikebygd.  Dei lokale kommunepolitikarane frå Vikebygd hadde kvar for seg sendt inn skriftleg spørsmål om orientering i formannskapet 7. juni, om framdrifta og planane. Einingsleiar for Areal og Forvaltning, Anne Sofie Sandvik, ga ein grundig og optimistisk informasjon.

Kommunestyret i Vindafjord har Sykkel og Gangsti forbi Vossaplasset og til Plassavegen, langs fylkesvege 734, som 1. prioritet på oversikt over lokale utbetrings- og trafikksikringstiltak i kommunen.

Den endelege prioriteringslista er det Rogaland fylke som vedtek seinare i år. Førebels har fylket bevilga 1,5 millionar kroner til planarbeid og oppstart.  Reguleringsplanen er frå 1999 og er dermed forelda, men vegvesenet vurderer om den er eit godt nok grunnlag. Dersom dei finn at denne er tilstrekkeleg, vil det bli utbetra ein teknisk plan for prosjektet og ein vonar dei aktuelle planane kan vedtakast politisk til hausten. Tor Gunnar Skår er engasjert av Vindafjord kommune til å få til minnelege avtalar om grunnavståing mm. Dei fleste grunneigarane har godtatt avtale her nå og ein vonar å bli samde med alle, ein føresetnad for å kunna gå vidare med prosjektet.

Seinhaustes skal det leggjast ny kraftlinje for å sikre straum fram til Trovåg Laks. Det er SØK som står for dette. Linja skal leggjast i jorda langs vegtrasèen. Det blir også vurdert kloakkleidning i same grøft. Ein kombinasjon av dette med bygging av sykkel og gangsti vil gje eit godt spleiselag mellom fylke, kommune og SØK, og ei forsvarleg finansiering.

Dette er ein fylkesveg, så planar og finansiering må godkjennast av fylket. Om så skjer i haust kan kommunen forskottere mellomlegget og arbeidet koma i gong alt i 2017.