Søndagsskule og Chris Show med Øystein
Fullt hus i Ølen Kulturhus laurdag
av Steinar Skartland 14.5.2017

Ei tverrkyrkjeleg dugnadsgruppe med Anne Lise Brekke Lien i spissen fekk Chris Duwe til Ølen laurdag 13. mai. Her hadde han sitt familieshow med søndagsskulepreg på kulturhuset for omlag 250 born og vaksne. 

Han hadde også med seg ungdomar som dansarar og medhjelparar og fleire lokale born på scena. Her var det rom både for humor og bibelhistorie, formidla gjennom forteljing, song, dans og ikkje minst gjennom bruk av dei store dokkene som Chris brukar. Ekte buktalarkunst har han godt tak på.

Ute i gangen hadde søndagsskulen stilt seg opp med stand, representert med krinssekretær Elisabeth Fauskanger og søndagsskulelærar Gunbjørg Nesbu og fleire andre. Dei delte ut søndagsskuleblad, informasjon og CD-plater. Dei siste åra har talet på søndagsskular lege nokså konstant på 80, fortel Elisabeth. Nokre har valt andre
dagar enn søndagen, og kanskje også andre former, som klubb, kor med meir.

I Vikebygd har ein etter fleire år med laurdagsklubb skifta over til å kalla denne for Venneklubben på fredag ettermiddag, men basert på mykje det same opplegget.