Dagen i dag:   , med minner frå
OPE BYGDAMØTE 11. NOV. 2009

Grendautvalet - ope bygdamøte onsdag 11.nov
Bygdamøte samla full sal.

(11.11.09  Steinar S)  Litlesalen vart full då over 80 spente vikebuar kom til Bygdahuset for å høyra kva leiar av Egersund Byutvikling, Johan Aakre, plastfabrikkant Kjell Erik Gangstø og ordførar Arne Bergsvåg hadde å seia om framtida til Vikebygd. At bygda har ressurspersonar sjølve som ein kan spela på, er grendautvalet med leiar Rune Hetland i spissen, sjølv eit eksempel på.

Johan Åkre fortalde om alt det spanande dei hadde fått til i julebyen Egersund. - Ein må våga å trø feil, sa han, og la til: - Dersom suksessen er stor nok så drit i fiaskoane.  - Det er lett å stoppa initiativ, verre å skapa noko nytt.  - Bruk det lokale framfor å leiga inn dyre underhaldarar frå Oslo. 

Og nettopp dette fekk møtelyden eit godt eksempel på då bonden og visesongaren Jone Bjerga fekk sleppa til med gitaren og sjølvlaga viser. - Ein bonde arbeider ofte åleine, og då får eg mange tankar som det blir songar av, sa han og imponerte med song og dikting. 

Men Vikebygd har mykje å vera stolt av.  Her er mykje dugnad og kreativitet, og bygda har ei positiv utvikling i folketalet, som nå er på 537.  Men det som opplevest som ei hindring både for busetjing og næringsliv, er vegen frå Vikebygd til Skjold.  Ei teljing av trafikken synte at 625 køyrety passerte Øvrabø på 24 timar.  Både rune Hetland og Kjell Gangstø synte til at det var mange vegprosjekt med vesentleg mindre trafikk som hadde fått millionbeløp til vegutbetring.  Her er aukande mengde med tungtransport, både med plast, tømmer og ikkje minst stein og grus frå knuseverket på Skartland.  Det vert jobba godt inn mot fylket for å få høgare prioritet her, noko ordføraren kunne stadfesta.  Han sit og i fylkestinget der budsjetta for 2010 nå er under arbeid. 

Ordføraren ga ei god oppsummering av kva som vert arbeida med, men hadde få lovnadar. 
- Vi ventar nå på at tomtedelingsplanen skal verta ferdig.  Dette vil utløysa 15-20 nye bustadtomter i Vikebygd, sa Bergsvåg. Han ville bruka midlar av næringsfondet til å rydde og profilere industriområdet. 
- Nå er det viktig å få reguleringsplan klar for vegen forbi Trovåg. Denne tek lett 1-2 år, men må vera klar før tunnelbygginga i Skjold.  Då kan overskottsmassar nyttast til fylling for vegen forbi Trovåg mot Skjold.

Optimisme er trass alt noko som pregar Vikebuen. - La oss laga stolar som kan setjast ut på utkikkplassar og der det er noko å visa fram, sa Solveig Hortmann, som fekk fylgje av Gunn Vikingstad som meinte skuleborna måtte inviterast til å vera med og laga desse.  Johan Åkre hadde med ei spesial laga T-skjorte som han ville gje til ein i Bygda som fortente denne ekstra godt.  Valet fall på "Gunn med den raude stripa", som han sa det.  Soknerådsleiar Brit Nelly Tveit måtte og på banen for å minna om dei store utfordringane som det er med vedlikehaldet av kyrkja som skal jubilera i 2012. 

Rune Hetland avslutta med å be grendeutval og lokalpolitikarar om å reisa seg. - Ta kontakt med desse om saker du er oppteken av, oppfordra han bygdefolket til. 

Grendautvalet har han gjort ein god jobb med å få til dette møtet.  At dei fortener ros for innsatsen, syner det gode frammøtet. Invitasjonen

Gå attende til hovudsida - HER