Lokale websider:

Bedrifter i Vikebygd:

Kultur - Historie:

Gamle Vikebygd:

Vikebygd nytt:

17. mai 2009:
Strålande sol, korps og folketog
På Trodlanibba stilte 14 til flaggheising klokka 07:00.

(17.5.09)  Alt laurdagskvelden var dei første på plass på fjelltoppen Seks ungdomar valde å gå opp om kvelden og ha med seg sovepose og telt.  Så overnatta dei på nuten og var klar til å ta imot dei åtte som gjekk opp tidleg på morgonen under leiing av Roald Årvik.  Avgang var 05:30 frå bedehuset.  Turen opp tok 1 time og 15 minutt.  Men veret var flott, og det var stas å få vera med og heisa flagget over bygda.

Så var det heimover igjen for å skifta og pynta seg.  Nokre av turgåarane skulle vidare til parken ved kyrkja.  Her heiste speidarane flagget til musikk av korpset.  deretter gjekk alle til gudsteneste i kyrkja.  Også her deltok korpset.  Så var det kransenedlegging ved minnestøtta og tale ved Anne Lise Auestad før ein stor del av folket i bygda deltok i folketoget opp til bygdahuset - via eldrebustadane.  

Jo, dagen vart ei flott markering av fridom og grunnlov.  Ei feiring der borna står i sentrum.  leiker, pølser og is høyrer med, for ikkje å gløyma ein svært utradisjonell fotballkamp mellom laget Vikebuen og soknerådet. Gratulerer med dagen.

Så kom kvelden med tradisjonell bygdefest-  Frammøtet var svært godt. Chester Danielsen var festtalar.  Gjennom 20 minuttar let han oss leva med i hendingane han fekk oppleva som ung i Vikebygd.  Korleis det var å gå på skule, bydelivet, kulturen og tida under krigen.
-Eg har mest gode minner frå den tida, fortalde han. - Kanskje fordi eg har fortrengt dei  vonde minnene og sit att med alle dei gode? 

Ellers var her rikeleg med innslag av unge solistar, sketsjar og danseopptrinn.  Og midt i programmet vart det også servert rundstykke, kaker, kaffi og saft.

Gunn Vikingstad inviterte alle som hadde vore på dugnad denne dagen, og andre med meiningar om framtidige år, til oppsummeringsmøte på bygdahuset tirsdag 26. mai.

Så vil eg retta ein varm takk til alle som deltok, om dei gjorde dugnad eller dei var deltakarar.  Flott å oppleva ein fest for vår nasjon, vår grunnlov og vår fridom, som har så rikt eit innhald.  Takk!!

Vikebygdsongen finn du HER.

Sjå bilder frå feiringa i Vikebygd HER (Fotoalbum)
 (Steinar S)

Oppsummering og evalueringsmøte:
17.mai arrangementet i Vikebygd vellukka
(26.5.09)  Leiaren i hovudkommiteen, Gunn Vikingstad, inviterte til evalueringsmøte på bygdahuset, og ei lita gruppe kom.  Gjenngangstonen i møtet var at dagen og arrangementet var vellukka.  Dei som stilte opp i kommiteane gjorde ein fantastisk jobb.  Det var mat nok til alle, og kommiteane takla det som dei fekk av oppgåver.  Kjempebra.  Takk til alle som stilte opp!

Ei rask oppteljing konkluderte med at omlag 200 var samla på bygdahuset om kvelden. Det er over 1/3- del av bygda.  Kjempeflott.  Det tyder på at festen er populær.  Det vanka berre skryt frå folk etterpå.

Men det var og ein del som ikkje stilte opp eller sende varamann for seg.  Det oppleves litt skuffande, for bygdefolket og borna fortener ein festdag som vi i saman får til.  Så neste år - då er det din tur.  Det skal bli 17. mai feiring då og.  Kanskje ein skal tenkja nytt i det å setja saman kommitear?  Skal ein t.d. gjera det slik at foreldra til ein eller to klassetrinn på skulen vert sett opp?  For nokre år sidan var det i alt over 60 aktive i kommitear.  I år var det omlag 35 aktive. , så det må nok ei brei deltaking frå bygda også i komande år.

Og arrangementet gjev inntekter til bygdahuset.  I år var overskottet heile 16.000 kr. (Steinar S)

17. mai:
Programmet for dagen
Sjå eller last ned programmet her:
(15.5.09)  Så er det klart for ein dag med tradisjonell feiring i Vikebygd, sjølv om ein dette året har streva meir enn vanleg med å få med folk i dei ulike komiteane.  Så derfor all ære og takk til dei som har teke ansvar og gjort ein stor og viktig jobb for å få til ei verdig markering av nasjonaldagen.

Nokre av underkomiteane opp-levde i år at svært få av dei inn-kalla møtte fram til oppstarts-møtet.  Det er derfor god grunn til å spørja om folk er lei av den tradisjonelle feiringa? Eller om det ikkje var dei rette person-ane som vart spurde? Kanhende det sit folk som seier med seg sjølv: -Eg kunne gjerne vore med, men ingen spurde meg. Då vonar vi dei vinkar litt med handa og tilbyr seg ei dugnadsøkt neste år.

Men fest blir det - heile dagen. Flaggheising, gudsteneste, korpsmusikk og tog, is og pølser, spikerslåing og folkefest om kvelden.  Så vonar vi at så mange som mogeleg møter opp og dermed viser at 17. mai - det er ein dag vi er glad i og vil vera med å markera.  God helg.
 (Steinar S)

Eg har teke meg den fridom å leggja ut mange bilete frå denne dagen.

Dersom nokon finn at tekst eller bilete på desse sidene er støytande eller ikkje skulle vore offentleggjorde her, ber eg om at de kontaktar meg snarast råd, enten ved å ringja 908 73 170 eller ved å klikka HER.    Eg vil då snarast råd korrigera dette. 
Helsing  Steinar Skartland