(21.3.2009)  Fire ungdomar frå Vikebygd fekk oppleva julefeiring på Madagaskar.  Laurdag deltok dei i misjonsdag på bedehuset med bilder, film og informasjon.  Sunniva viste fram fleire gjenstandar dei hadde med seg frå opplevingane på den Afrikanske øya som nå er prega av ein meir uroleg kvardag enn då ungdomane var der.

Omlag 50 i alle aldrar var innom bedehuset og fekk kjøpa seg middag.  Oppskrifta var Gassisk, men maten var nok laga i Vikebygd denne dagen.  Same mat som ungdomane fekk eta på juleafta i Bara-provinsen. På loftet var borna samla til ulike aktivitetar med spel, maling og leik.  Soknerådet, bedehuset og laurdagsklubben  samarbeida om denne misjonsdagen der det m.a var song av borna, song av leiarane i laurdagsklubb og basar med svært mange flotte gevinstar.
-Det må nå ha vore minst 60 og sikkert fleire som var innom arrangementet, meinte  Kjersti Hausberg Bjerga som hadde leiaransvaret for arrangementet og førebuingane, saman med Brit Nelly Tveit og fleire andre som velvillig stilte opp når dei vart spurde om å hjelpa til.

Etter at utgiftene er dekka er det att omlag 8000 kroner som går til Misjonsprosjektet: Landsbybygging i Bara-provinsen på Madagaskar. Her ligg og landsbyen Ihlosy, som er Vindafjord sin venskapskommune.