Vikebygd Kyrkje treng omfattande vedlikehald (30.1.09)   I samband med bispevisitasen i 2008 vart kyrkjebyggkonsulenten i Stavanger Bispedømme, Finn Bårdsen, beden om å utarbeida ein status rapport for vedlikehaldet på kyrkja i Vikebygd. Rapporten syner at det er trong for omfattande vedlikehaldstiltak. Gjennom fleire år med små løyvingar har mange mindre forhold fått utvikla seg.
 
Kyrkja i Vikebygd vart innvigd i 1937 og skal såleis feira 75 års jubileum i 2012. Då er det ein viktig milepæl der det i forkant bør gjerast tiltak for å setja kyrkja i god stand. Kostnaden er ikkje kalkulert ennå, men ut i frå Bårdsen sin rapport, ser ein fort at dette kan bli kostbart.
 
Bårdsen peiker i rapporten m.a. på:
*Begge portalane treng vedlikehald og maling.
*Alle vindauger mot sør treng umiddelbare reparasjonar.
*Glasmåleria mot aust kan få ubotelege skader om dei ikkje snarast vert ordna.
*Sidedør i sørveggen har store fukt- og råteskader.
*Alle ytterdører treng omfattande vedlikehald.
*Lukene i tårnet treng reparasjonar etter herjing av ver og vind.
*Skifertak, takvindauger og murvegger treng nærare inspeksjon og lekkasjar må tettast.
*Skorsteinen har fuktskader og er i dårleg forfatning. Ein bør vurdera riving av denne.
*Kyrkja har berre ein midlertidig handikapinngang på austsida. Her må lagast ny, og døra i sør er lageleg for dette.
*Det gamle fyrrommet har fuktighet og dårleg utlufting. Dette må vurderast tiltak mot.
*Yttertak over sakrestia har fukt skader.
*Kyrkja treng å malast.
*Innvendig trengs og noko oppussing, orgelstemming og reparsjon av luftfuktar.
*Bårehuset må vurderast mtp tak og innvendig vedlikehald,
 
Det er mange punkt, og soknerådet har årleg laga rapport som er sendt til fellesrådet der mykje av dette er peika på frå før. Men midlane kyrkja rår over strekk ikkje til. Fellesrådet har heile 8 kyrkjer i kommunen som alle treng sitt. Nå vonar folket i Vikebygd at det er denne bygda sin tur til å bli prioriterte. Ekstra løyvingar frå staten til vedlikehaldsprosjekt i kommunane kan vera ein utveg til å få koma i gong. Men det hastar.
 
Sjølv om det er Kyrkjeleg Fellesråd som har ansvaret for vedlikehald et av kyrkja, så har soknerådet i Vikebygd sett ned ein kommite som nå skal vera pådrivar på soknerådet si side for å sikre at saka kjem vidare. Kyrkjeverja har sendt alle rapportane over til kommunen og orientert formannskapet. Så vonar vi at det skal finnast penger til å få sett i gong med det som hastar mest snarast.
 
Les tilstandsrapportane i arkivet til Vindafjord Kommune.