Sjølv om ein og annan kjøper og pussar opp eldre hus, eller riv dei og byggjer nytt, så går folketalet i Vikebygd sakte nedover.  Toppåra var 2010-2011 med 563 innbyggjarar.  Nå er her fem mindre, i alt er vi 558.

Folketalet i heile Vindafjord har vore jamt aukande og var ved årsskiftet 8747.  Held trenden fram når kommunen 9000 innbyggjarar innan to-tre år. Stort og attraktivt byggjefelt på Vikaneset i Skjold kan bidra til dette.  Likevel er ein stor del av veksten i kommunen innflyttarar frå andre land. Auken skjer i stor grad langs E134.  Ein betre veg frå Vikebygd til Skjold kunne ha gjort forskjellen.  12 km frå Isvik til butikken i Vikebygd utgjer berre 12 minutt med 60 km i timen.  Det har vore jamt aukande med fritidsbustader i Vikebygd. Det er ein attraktiv plass å vera i helgar og feriar.  Fisk i fjorden og flott natur er nok berre to grunnar mellom mange til at folk likar seg i bygda. 

Ei av dei nye tomtene på Lio-feltet er selde, men her er ikkje kome opp hus ennå.  Med 19 byggjeklare tomter bør det vera grunnlag for å sjå ein auke også her i bygda.  Grendautvalet sin fokus på vegen, gangstiar, å rydde skog for å opna opp bygda osb. er med og fører bygda i positiv retning.  Det kan ein også trygt seia om aktiviteten i alle dei lag og foreiningar som driv i Vikebygd.  La oss vona at nokon ser verdiane som ligg i bygda og vil ta del i desse ved å sjå nærare på ein av dei ledige tomtene, like ved skule, barnehage og butikk.  
 

I desse tider med mykje prat om å slå saman kommunar, kan det vera greit å ta med litt frå vår eigen lokale historie her i Vikebygd (henta frå tidlegare Hordarkiv og Wikipedia).

Då dei norske kommunane vart oppretta ved formannskapslovene i 1837 var Vikebygd ein del av Fjelberg kommune. I 1865 vart så Sveio kommune oppretta ved frådeling av Sveio sokn i Finnås kommune og Vikebygd sokn (1 062 innbyggjarar) i Fjelberg kommune. I 1902 vart endeleg Vikebygd utskild som eigen kommune, då med 1 092 innbyggjarar.

Kommunesenteret låg i Sveio, kyrkja låg i Austre Vikebygd.  Ferdsel over fjorden med båt var den vanlege reisemåten den gongen.

I 1964 vart kommunen delt mellom kommunane Sveio og Ølen. Kommunen låg i Sunnhordland på aust- og vestsida av Ålfjorden. Før kommuneinndelinga i 1964 grensa Vikebygd mot Valestrand kommune i nord og nordvest, mot Sveio i vest og mot Ølen i aust. I sør gjekk grensa mot kommunane Tysvær og Vindafjord i Rogaland fylke.  Austre Vikebygd hadde då Aarvik, Veastad og Vik krinsar med 578 innbyggjarar.

Ølen vart så i 2002 overflytta til Rogaland fylke og i 2006 lagd til Vindafjord kommune.

Link til FOTOALBUM for Vikebygdd

Fleire reportasjar frå Vikebygd 2013 ser du her.